- English
- Māori (active language)
Ko ngā tūāhuatanga o te wāhi pōti
Anei ngā tūāhuatanga o ngā wāhi pōti i te Pōtitanga Pāerotanga o Te Pūwaha o Waikato.
Hei tō taenga atu ki te wāhi pōti, ka mihi atu ngā kaimahi ki a koe, ā, ka whakautu rātau i ō pātai. He kākahu karaka ō rātau.
Ka kitea hoki he tohu e ārahi ana i a koe ki ngā wāhi tika.
Mehemea he kāri Pōti Tere tāu, mauria atu tō kāri ki te wāhi pōti, ā, kōwhiritia tētehi wāhi pōti e tata ana ki tō kāinga. Ka māmā ake te pōti mehemea ka pērā.
Mehemea kua rēhita koe i mua i te 14 o Oketopa , ka noho tō ingoa ki te rārangi pōti ā-pepa e takoto ana ki ngā wāhi pōti i roto i tō rohe pōti, nō reira, ka māmā ake te tuku atu i ō puka pōti ki a koe.
Te tango whakaahua me te kapo kiriata
He matatapu te pōti, nō reira, ko tā mātau inoi ki a koe, tiakina te matatapu o ngā kaipōti.
Kaua e tango whakaahua, e kapo kiriata rānei, i roto i te wāhi pōti.
He hara ā-ture te whakaputa whakaahua, te whakaputa kiriata rānei o te tangata e whakakī ana i tana puka pōti. Kāhore e whakaaetia i ngā wāhi pōti.
Mehemea he take e hiahia nā koe ki te tango whakaahua, te kapo kiriata rānei – hei tauira, e tuku ana tētehi kaitono i tana pōti – tēnā, tukua mai tō tono i mua i te wā pōti ki returns@elections.govt.nz
Te noho tonu ki te wāhi pōti
Ā muri i tō pōti, kua wātea koe. Tēnā rawa atu koe mōu i whakaputa i ō whakaaro i te pōtitanga ā-motu o 2023. He mana tō te pōti. Na, ko te inoi ki te hunga kua pōti, kia wātea te wāhi pōti mō te hunga e whai mai ana i a koutou.
Mā konei e matatapu ai te pōti, e tau ai te mauri o ngā kaipōti i a rātau e tuku ana i ā rātau ake pōti. Ngā mihi i tō whai whakaaro mai.
Ko ngā pae pāpāho pāpori
I te wā o te pōtitanga, he ture e pā ana ki ngā mahi pae pāpāho pāpori.
Ā te weheruatanga o te pō i mua i te rā pōti, tatū atu ki te 7 karaka i te pō o te rā pōti, kāhore e āhei koe ki te tuku atu i ngā pōhi pae pāpāho pāpori ka whakaaweawe peangē i tā te kaipōti kōwhiri i te kaitono, i te rōpū tōrangapū rānei.
I te rā pōti, kāhore e whakaaetia ngā whakatairanga pōtitanga kua utua.
E uhia ana e ēnei ture rā pōti ngā kōrero ā-ipurangi mō ō tātau whakaaro whaiaro e pā ana ki ngā āhuatanga tōrāngapū.
Ko ō mātau kaimahi
E noho ana ki tōu ake takiwā te nuinga o ngā kaimahi o Te Kaitiaki Take Kōwhiri e mahi ana i tō wāhi pōti. Ko tō rātau hiahia rātau he āwhina i a koe ki te whakatinana i tō mōtika pōti.
He tuatahinga ki te tokomaha te mahi i te pōtitanga, ā, he maha ngā āhuatanga hei maumahara mā rātau, hei mahi mā rātau!
Mehemea he wā e tatari ana koe, tēnā, kia manawanui mai ki ō mātau kaimahi i a rātau e āta whai ana i ngā raupapa ki te tiaki i tā tātau tukanga pōtitanga.
Mō mātau
E whakahaere ana Te Kaitiaki Take Kōwhiri i ngā pōtitanga pāremata. E whai ana mātau kia whaihua, kia tōkeke, kia mārama tā tātau pūnaha pōti ki ngā tāngata o Aotearoa, ā, kia whakapono mai tātau ki taua pūnaha.
Kei ngā tāngata katoa o Aotearoa te mōtika kia wātea ki te kōwhiri i ā tātau pōti. Ka tiaki mātau i te matatapu o tō pōti i a koe e pōti ana, i a mātau e tatau ana hoki i ngā pōti.
Ko tā mātau inoi ki a koe, kia tautoko mai i tā mātau whakahaere i te wāhi pōti. Kua whakaritea ā mātau tukanga kia pai ai ā tātau wheako pōti, kia haumaru ai ā tātau matatapu, ā, kia tiakina ā tātau mōtika.
Mehemea ka raru te wāhi pōti i tētehi tangata, i tētehi rōpū rānei, ā, kāhore e kitea he rongoā atu nō, ka tohua aua tāngata ki te wehe. Mehemea kāhore e whāia taua tohutohu, he hara ā-ture tērā, ā, ka kōrerotia ki ngā pirihimana.